BYD kompaniyasining Yevropa bozori uchun tayyorlanayotgan BYD Dolphin G modeli saloni ilk bor ko‘rindi. Avtomobil plagin-gibrid xetchbek sifatida ishlab chiqilgan.
Model Yevropa uchun maxsus yaratilgan ilk BYD avtomobillaridan biri bo‘ladi. Uning ishlab chiqarilishi Vengriyaning Seged shahridagi zavodda yo‘lga qo‘yilishi kutilmoqda. Dolphin G narxlari iyun oyida e’lon qilinadi. Yetkazib berishlar esa 2026-yil kuzida boshlanishi rejalashtirilgan.
Xitoyning Autohome nashri model salonining josuslik suratini e’lon qildi. Unda avtomobil minimalistik dizayn olgani ko‘rinadi. Salon markazida alohida joylashtirilgan sensorli ekran bor. Haydovchi oldida esa LCD asboblar paneli o‘rnatilgan.
Dolphin G uch spitsa dizayndagi rulga ega. Uzatma selektori rul ortida joylashgan. Markaziy tunnelda bir nechta jismoniy tugmalar saqlab qolingan. Ular orasida haydash rejimini tanlash tugmasi, musiqa ovozini boshqarish elementi va avariya chiroqlari tugmasi bor.
Salonning boshqa qismlarida bitta stakan ushlagich, yashirin bo‘lim va o‘zgaruvchan markaziy qism ko‘zga tashlanadi. Havo deflektorlari BYD Atto 3 krossoveridagi yechimga o‘xshaydi. Avtomobilning qolgan salon qismi mato bilan yopilgan. Shu sababli interyerning barcha tafsilotlari hozircha ko‘rinmayapti.
Avvalroq Dolphin G tashqi dizayni rasmiy suratlarda namoyish qilingan edi. Model ingichka faralar, faol havo kirish qismi va old bamperdagi havo yo‘naltirgichlarga ega. Avtomobil yarim yashirin eshik tutqichlari va qoraytirilgan D ustunlari bilan ham ajralib turadi.
BYD Dolphin G uzunligi 4 160 mm, eni esa 1 825 mm.ni tashkil qiladi. U Yevropada sotilayotgan elektr Dolphin modelidan 130 mm qisqaroq, lekin 55 mm kengroq. Modelning kuch qurilmasi haqida rasmiy ma’lumot berilmagan. Taxminlarga ko‘ra, u 1,5 litrli atmosfera dvigateli va elektromotor bilan jihozlanadi.
Benzin dvigateli 72 kW yoki 97 ot kuchi ishlab chiqarishi mumkin. Elektromotor quvvati esa 145 kW yoki 194 ot kuchiga teng bo‘lishi kutilmoqda. Avtomobil 7,8 kWh va 18 kWh sig‘imli ikki xil batareya bilan taklif qilinishi mumkin. Tizimning umumiy quvvati 156 kW yoki 209 ot kuchiga yetishi aytilmoqda.
Qaynoq24.uz BYD 1800 km yura oladigan yangi krossoverini chiqarishi haqida yozgan edi.
