Redmi kompaniyasi tomonidan arzon Redmi Turbo 5 smartfoni Hindistonda sotuvga chiqarildi. Bu haqda Gizmochina nashri xabar bermoqda.
Model avvalroq, yanvar oyida Xitoyda taqdim etilgan edi. Bu Redmi Turbo seriyasining Hindistondagi ilk rasmiy debyuti hisoblanadi. Shunga qaramay, narxlar taqqoslanganda xitoylik xaridorlar hali ham foydaliroq taklifga ega bo‘layotgani ko‘rinmoqda.
Bundan tashqari, Hindistondagi boshlang‘ich 8 GB tezkor xotirali versiya ham Xitoydagi 12 GB tezkor xotirali modeldan qimmatroq chiqmoqda. Bunday narx farqi Xitoy brendlari Hindistonda sotilayotganda ko‘p uchraydi. Import bojlari, GST solig‘i, logistika xarajatlari va mahalliy bozor sharoitlari yakuniy narxga ta’sir qiladi. Shunga qaramay, bir xil protsessor va akkumulyatorga ega qurilma uchun hindistonlik xaridorlar ancha yuqori narx to‘layotgani ko‘zga tashlanadi.
Redmi Hindistonda xaridorlar uchun ayrim chegirmalarni ham taklif qilmoqda. SBI, ICICI va Axis Bank kartalari orqali xarid qilinganda 2 000 rupiygacha tezkor chegirma berilishi mumkin. Smartfon savdosi 19-iyundan Amazon India, mi.com hamda oflayn do‘konlar orqali boshlanadi. Model Turbo White, Nitro Blue va Asphalt Black ranglarida taklif etiladi.
Texnik jihatdan Redmi Turbo 5 kuchli o‘rta-yuqori segment smartfoni sifatida joylashmoqda. Qurilma MediaTek Dimensity 8500 Ultra chipseti, LPDDR5X Ultra tezkor xotira va UFS 4.1 ichki xotira bilan jihozlangan. Uzoq vaqt davomida o‘yin o‘ynash yoki og‘ir vazifalarda qizishni kamaytirish uchun smartfonda 5 300 mm² bug‘ kamerali sovitish tizimi qo‘llangan.
Redmi ma’lumotiga ko‘ra, Turbo 5 AnTuTu testida 2 mln balldan yuqori natija ko‘rsatadi. Kompaniya bu orqali smartfon OnePlus Nord CE6 va Nothing Phone (4a) Pro kabi raqobatchilardan ustunroq ekanini ta’kidlamoqda.
Texnik imkoniyatlar
Smartfon 6,59 dyuymli 1,5K AMOLED displey bilan jihozlangan. Ekran 120 Gs yangilanish chastotasini qo‘llab-quvvatlaydi. Modelning eng muhim ustunliklaridan biri esa 7 540 mA·soat sig‘imli yirik akkumulyatoridir. U 100 Vt HyperCharge tezkor quvvatlash texnologiyasi bilan ishlaydi.
Redmi Turbo 5 korpusi ham kuchli himoya standartlariga ega. Qurilma IP66, IP68, IP69 va IP69K darajalari bo‘yicha chang va suvdan himoyalangan. Bu uni kundalik foydalanishda, yomg‘ir, chang yoki nam muhitda yanada bardoshli qiladi.
Kamera qismida smartfon 50 MP Sony IMX882 asosiy sensoriga ega. U optik stabilizatsiya bilan jihozlangan. Shuningdek, orqa tomonda 8 MP ultra keng burchakli kamera ham bor. Kamera modulining atrofida sozlanadigan LED piksel-matritsa halqasi joylashtirilgan. Qurilma Android 16 asosidagi HyperOS 3 interfeysi bilan ishlaydi.
Umuman olganda, Redmi Turbo 5 Hindiston bozorida katta batareya, kuchli protsessor, tezkor xotira, 120 Gs AMOLED ekran va yuqori himoya darajasi bilan raqobatga kirishmoqda. Biroq narx masalasida Xitoy bozori hali ham ancha foydaliroq bo‘lib qolmoqda.
Narx
Hindistonda Redmi Turbo 5’ning 8 GB tezkor va 256 GB ichki xotirali talqini taxminan 381 dollardan sotuvga chiqdi. 12 GB tezkor va 256 GB ichki xotirali versiya esa taxminan 413 dollar etib belgilangan.
Xitoyda esa Redmi Turbo 5’ning 12/256 GB talqini 2 299 yuandan sotilmoqda. Amaldagi kurs bo‘yicha bu taxminan 340 dollarga teng. Ya’ni Hindistonda aynan shu 12/256 GB talqin uchun xaridorlar qariyb 73 dollar ko‘proq to‘laydi.
Qaynoq24.uz Redmi K90 Ultra iyun oyida taqdim etilishi haqida yozgan edi.
