Xiaomi kompaniyasi Xitoyda Redmi K100 smartfonlari turkumining taqdimotiga tayyorgarlik ko‘rmoqda. Bu haqda Gizmochina xabar berdi.
Yangi modellar ChinaJoy 2026 ko‘rgazmasida namoyish etilishi, rasmiy taqdimot esa avgust oyida o‘tkazilishi kutilmoqda.
Taqdimot arafasida M511CD model raqamiga ega yangi Xiaomi smartfoni Geekbench sinov platformasida paydo bo‘ldi. Ushbu qurilma Redmi K100 turkumidagi modellardan biri ekani taxmin qilinmoqda. Avvalroq xuddi shu smartfon Xitoyning 3C sertifikatlash bazasida 100 vattli quvvatlash qurilmasi bilan qayd etilgan edi.
Geekbench ma’lumotlariga ko‘ra, smartfon Snapdragon 8 Elite Gen 5 protsessori va 16 GB tezkor xotira bilan jihozlangan. Qurilma Android 16 operatsion tizimida ishlaydi, biroq unda Xiaomi’ning yangi HyperOS 4 interfeysi qo‘llanishi hozircha tasdiqlanmagan.
Smartfon bir yadroli sinovda 3 429 ball, ko‘p yadroli rejimda esa 10 461 ball to‘plagan. Bu natijalar Redmi K100 turkumi yuqori unumdorlikka mo‘ljallangan flagman darajasidagi qurilmalar qatoriga kirishini ko‘rsatmoqda.
Dastlabki ma’lumotlarga ko‘ra, Redmi K100 va uning yuqori versiyalari 185 Gts yangilanish chastotasiga ega OLED ekran oladi. Displey ostiga ultratovushli barmoq izi skaneri o‘rnatilishi kutilmoqda.
Standart Redmi K100 8 500 mA·soat sig‘imli akkumulyator va simsiz quvvatlash imkoniyatiga ega bo‘lishi mumkin. Redmi K100 Pro yoki Pro Max versiyasida esa batareya sig‘imi 9 000 mA·soatgacha yetishi aytilmoqda. Har ikki modelda Snapdragon 8 Elite Gen 5 protsessoridan foydalanilishi kutilmoqda.
Standart modelning asosiy kamerasi 200 megapikselli sensor bilan jihozlanishi mumkin. Unga 50 megapikselli ultra keng burchakli kamera va 50 megapikselli telefoto-makro modul hamrohlik qiladi. Pro versiyasida oddiy telefoto kamera o‘rniga 50 megapikselli periskop moduli o‘rnatilishi taxmin qilinmoqda.
Redmi K100 turkumi kuchaytirilgan dinamiklar, yirik vibratsiya motori hamda IP68 va IP69 standartlari bo‘yicha suv va changdan himoyalangan korpus olishi ham aytilmoqda. Xiaomi hozircha smartfonlarning yakuniy texnik xususiyatlari, narxlari va aniq taqdimot sanasini rasman e’lon qilmagan.
Qaynoq24.uz Redmi Note 17 global narxlari qandayligi haqida yozgan edi.
