Google kompaniyasi Google Pixel 11 smartfonlari turkumini 12-avgust kuni taqdim etishi kutilmoqda. Bu haqda Gizchina nashri xabar bermoqda.
Dastlabki ma’lumotlarga ko‘ra, yangi avlod modellari avvalgisiga nisbatan qimmatroq bo‘ladi. Biroq narxlarning oshishi barcha qurilmalarda bir xil sabab bilan bog‘liq emas.
Google Pixel 11 va Pixel 11 Pro uchun 128 GB xotirali eng arzon versiyalardan voz kechishi aytilmoqda. Natijada har ikki modelning boshlang‘ich konfiguratsiyasi 256 GB xotira bilan taklif etiladi.
256 GB sig‘imli Pixel 11 va Pixel 11 Pro narxlari o‘tgan yilgi xuddi shunday xotirali Pixel 10 modellari bilan deyarli bir xil qolishi mumkin. Shunday bo‘lsa-da, 128 GB versiyaning chiqarilmasligi sababli yangi smartfonlarni xarid qilish uchun to‘lanadigan eng kam summa taxminan €100 ga oshadi.
Pixel 11 Pro XL va bukiladigan Pixel 11 Pro Fold’da esa narxlarning haqiqiy oshishi kutilmoqda. Ma’lumotlarga ko‘ra, ushbu ikki modelning barcha xotira konfiguratsiyalari €100 ga qimmatlashadi. Bunda xotira hajmi oshirilishi yoki boshqa kompensatsiya nazarda tutilmagan.
AQSh bozori uchun narxlar hozircha oshkor qilinmagan. Yevropa narxlarini dollarga bevosita aylantirish to‘g‘ri natija bermaydi, chunki Google har bir bozorda soliqlar, operatorlar bilan kelishuvlar, talab va raqobatni hisobga olgan holda alohida narx belgilaydi. Tahlilchilar AQShda ayrim modellar $50–100 oralig‘ida qimmatlashishi mumkinligini taxmin qilmoqda.
Narxlar oshishining asosiy sabablaridan biri tezkor va ichki xotira komponentlarining qimmatlashishi sifatida ko‘rsatilmoqda. Sun’iy intellekt ma’lumotlar markazlarida LPDDR5X va NAND xotirasiga talabning keskin ortishi iste’molchi qurilmalari uchun ta’minotni cheklamoqda.
Pixel 11 turkumidagi asosiy texnik yangilanish Tensor G6 protsessori bo‘lishi kutilmoqda. TSMC’ning 2 nanometrli texnologiyasi asosida ishlab chiqariladigan chip avvalgi Pixel smartfonlarida kuzatilgan qizib ketish, unumdorlikning pasayishi va modemning ko‘p quvvat sarflashi bilan bog‘liq muammolarni kamaytirishi mumkin.
Qaynoq24.uz Google Pixel 10 foydalanuvchilari muammoga duch kelgani haqida yozgan edi.
