Mazda kompaniyasi o‘ng rulli Mazda 6e elektromobilining ilk seriyali partiyasini Tailandga yetkazib berdi. Model iyul oyida Tailand va Avstraliya bozorlarida sotuvga chiqarilishi kutilmoqda. Keyinroq avtomobil Buyuk Britaniyada ham taqdim etiladi.
Thairath Online ma’lumotiga ko‘ra, 500 ta 6e avtomobilidan iborat birinchi partiya Pattaya shahri shimolidagi Laem Chabang portiga yetib kelgan. Bu o‘ng rulli Mazda 6e’ning seriyali ishlab chiqarilgan holatda ilk bor omma oldida ko‘rinishi bo‘ldi.
Mazda 6e Xitoydagi Changan-Mazda qo‘shma korxonasining Nankin ishlab chiqarish bazasida tayyorlanadi. Xitoy bozorida ushbu model Mazda EZ-6 nomi bilan sotiladi. 6e allaqachon boshqa o‘ng rulli bozorlarga, jumladan Buyuk Britaniya, Singapur, Gonkong va Indoneziyaga ham chiqarilishi tasdiqlangan. Malayziya bozoriga olib kirish masalasi ham ko‘rib chiqilmoqda.
Mazda EZ-6 ilk bor Xitoyda 2024-yil oktabr oyida sotuvga chiqarilgan. Eksportga mo‘ljallangan Mazda 6e esa 2025-yilgi Bryussel avtosalonida namoyish etilgan. Yevropada chap rulli versiyalarni yetkazib berish 2025-yil o‘rtalarida boshlangan. 6e faqat to‘liq elektromobil sifatida taklif etiladi, Xitoydagi EZ-6 esa EREV, ya’ni yurish zaxirasini uzaytiruvchi gibrid versiyada ham mavjud.
Qaynoq24.uz yangilangan Chery Arrizo 8 19,9 ming dollardan sotuvga chiqqani haqida yozgan edi.
