Honor kompaniyasining harakatlanuvchi kameraga ega Honor Robot Phone smartfoni 2026-yil avgust oyida rasman taqdim etilishi mumkin. Bu haqda Gizmochina ma’lum qildi.
Foydalanuvchilardan biri Honor Robot Phone yetarli darajada kuchli bo‘ladimi, deb so‘raganida, insayder “Tez orada, avgustda” deya javob qaytargan. Honor hozircha qurilmaning aniq taqdimot sanasini oshkor qilmagan. Biroq bu ma’lumot kompaniyaning avvalgi bayonotiga mos keladi. Unda Robot Phone 2026-yilning ikkinchi yarmida Xitoy bozorida sotuvga chiqarilishi aytilgan edi.
Honor Robot Phone ilk bor 2026-yilda Barselonada bo‘lib o‘tgan Mobile World Congress ko‘rgazmasida namoyish etilgan. Qurilma an’anaviy smartfon kameralaridan keskin farq qiluvchi konstruksiyasi bilan e’tiborni tortgan. Uning orqa qismiga korpus ichidan tashqariga chiqadigan, buriladigan va tasvirga olish vaqtida o‘zini barqarorlashtira oladigan mexanik kamera moduli o‘rnatilgan.
Smartfon kamerasi maxsus motorlashtirilgan tutqichda joylashgan bo‘lib, u turli yo‘nalishlarda harakatlana oladi. Kamera videoga olayotganda obyektni mustaqil kuzatishi, burilishi va tasvir titrashini kamaytirishi mumkin. Honor ma’lumotiga ko‘ra, modul 200 megapikselli sensor hamda kompaniya tomonidan sohadagi eng ixcham to‘rt darajali erkinlikka ega gimbal sifatida ta’riflangan barqarorlashtirish tizimi bilan jihozlangan.
Mazkur texnologiya qo‘lda video suratga olishda tasvirni yanada silliq qilish, harakatlanayotgan obyektlarni aniq kuzatish va professional darajadagi videolar yaratishga xizmat qiladi. Kamera modulining mexanik tuzilishi smartfonga oddiy mobil qurilmadan ko‘ra kichik robot yoki avtomatik operatorga o‘xshash imkoniyatlarni beradi.
Honor Robot Phone’ning imkoniyatlari Shanxay xalqaro kinofestivalida ham namoyish etilgan. Kompaniya qurilma yordamida professional kinematografik lavhalarni suratga olib, uning real ishlab chiqarish sharoitidagi video imkoniyatlarini sinovdan o‘tkazgan.
Honor Robot Phone mexanik barqarorlashtirish tizimi, sun’iy intellekt imkoniyatlari va professional video vositalarini bir qurilmada birlashtirishi bilan an’anaviy flagman smartfonlardan ajralib turadi.
Qaynoq24.uz Honor 200 MP kamerali buklamali smartfon tayyorlayotgani haqida yozgan edi.
