Yangilangan Kia Sportage 2026 restaylingdan so‘ng krossoverlar segmentida Toyota RAV4’ga eng jiddiy raqiblardan biri sifatida baholanmoqda.
Model tashqi dizayni, texnologik jihozlanishi, salondagi qulayliklar va narx bo‘yicha ekspertlar e’tiborini tortdi. Ayniqsa, parallel import sharoitida bu model Rossiya bozori uchun ham dolzarb hisoblanmoqda.
Kia Sportage 2026 dizayni kompaniyaning «qarama-qarshiliklar uyg‘unligi» konsepsiyasi asosida shakllantirilgan. Avtomobilning old qismi yanada agressiv ko‘rinishga ega bo‘lgan, yaltiroq radiator panjarasi, sarg‘ish kunduzgi yurish chiroqlari va kuzovdagi o‘ziga xos bezak elementlari unga yo‘lda ajralib turadigan qiyofa beradi.
Modelning X-Pro Prestige deb nomlangan maxsus yo‘ltanlamas talqini esa faol dam olish va yengil off-road sharoitlariga moslashtirilgan. Ushbu versiyada yangi bamperlar, yangilangan optika va 17 dyuymdan 19 dyuymgacha bo‘lgan g‘ildirak disklari taklif etiladi. Wolf Grey rangi yo‘ltanlamas uslubidagi disklar bilan birgalikda model muxlislari orasida eng e’tiborli variantlardan biriga aylangan.
Sportage’ning yana bir kuchli tomoni amaliy qulaylikdir. Avtomobil kalit orqali dvigatelni masofadan ishga tushirish funksiyasiga ega va buning uchun qo‘shimcha obuna yoki alohida to‘lov talab qilinmaydi. Kia’ning noodatiy rul shakli va klassik eshik tutqichlari modelga o‘ziga xoslik beradi, garchi bu qaror hamma haydovchilarga birdek ma’qul kelmasligi mumkin.
Texnik imkoniyatlari
Texnik jihatdan Kia Sportage 2026 2,5 litrli turbomotor va 8 pog‘onali avtomatik uzatmalar qutisi bilan taklif etiladi. Test haydovchilari dvigatel javob qaytarish tezligini eng kuchli jihat deb baholamagan bo‘lsa-da, avtomobilning yurish ravonligi, burilishlarda kuzovning kam og‘ishi va umumiy boshqaruv sifati ijobiy baholangan.
O‘lchamlar bo‘yicha Kia Sportage Toyota RAV4’dan taxminan 10 santimetr uzunroq. Bu farq ikkinchi qatordagi yo‘lovchilar uchun ko‘proq joy va kattaroq yukxona hajmini ta’minlaydi. Orqa o‘rindiqda oyoqlar uchun kengroq masofa bor, bagaj bo‘limi esa ko‘proq yuk sig‘dira oladi. Bu jihatlar oilaviy foydalanish va uzoq safarlar uchun muhim ustunlik sifatida ko‘rilmoqda.
Kia’ning yana bir muhim ustunligi kafolat shartlaridir. Sportage kuch agregati uchun 10 yil yoki 161 ming kilometrgacha kafolat bilan taklif etiladi. Toyota RAV4’da esa bu ko‘rsatkich 5 yil yoki 96,5 ming kilometrni tashkil qiladi. Yo‘lda yordam ko‘rsatish va servis kafolati bo‘yicha ham Kia ayrim jihatlarda oldinda ekani qayd etilmoqda. Bu esa odatda Toyota’ni ishonchlilik mezoni sifatida ko‘radigan xaridorlar uchun jiddiy dalil bo‘lishi mumkin.
Qaynoq24.uz Huawei va BAIC Stelato G9 yo‘ltanlamasini tayyorlayotgani haqida yozgan edi.
