Vivo kompaniyasi yangi Vivo X Fold 6 buklama smartfoni haqidagi navbatdagi tafsilotlarni e’lon qildi. Qurilmada asosiy e’tibor avtonom ishlash, chidamlilik va barqaror aloqa imkoniyatlariga qaratilgan.
Vivo mahsulot menejeri Han Boxiao ma’lum qilishicha, X Fold 6 barcha versiyalarda 7000 mA/soat sig‘imli Blue Ocean akkumulyatori bilan jihozlanadi. Kompaniya smartfonni beshinchi avlod kremniy-anod batareya texnologiyasiga ega ilk buklama qurilma sifatida ta’riflamoqda. U Vivo‘ning uchinchi avlod yarim qattiq holatdagi batareya texnologiyasi bilan to‘ldirilgan.
Kompaniya ma’lumotiga ko‘ra, yangi batareya tizimi og‘ir yuklama sharoitida 9,8 soatgacha ishlashni ta’minlaydi. Bu avvalgi ko‘rsatkichlarga nisbatan 30 foizlik o‘sish demakdir.
X Fold 6 ekstremal sharoitlarda ham ishlashi aytilmoqda. Qurilma minus 20 daraja sovuqda faoliyatini davom ettirgan, shuningdek, suv ostida ishlatilgani ham namoyish qilingan. Smartfon IPX8 va IPX9 himoya darajalariga ega bo‘lib, kuchli suv bosimiga bardosh bera olishi ta’kidlanmoqda.
Aloqa sifati ham modelning muhim jihatlaridan biri bo‘ladi. X Fold 6 Global Signal Amplification System 3.0 texnologiyasi, bitta maxsus signal kuchaytiruvchi chip va to‘rtta Wi-Fi kuchaytiruvchi chipdan iborat aloqa arxitekturasi bilan jihozlanadi. Bu tizim poyezd, lift, avtomagistral va aloqa qiyin bo‘lgan hududlarda barqaror ulanishni ta’minlashga mo‘ljallangan.
Avvalroq X Fold 6 8,02 dyuymli buklama OLED displey, 5000 nitgacha yorqinlik, Dimensity 9500 Super Edition chipseti hamda 200 megapikselli asosiy kamera, 50 megapikselli ultra keng burchakli kamera va 50 megapikselli periskop telekameradan iborat uchlik kamera tizimiga ega bo‘lishi tasdiqlangandi.
Smartfon 12/256 GB, 12/512 GB, 16/512 GB va 16 GB/1 TB konfiguratsiyalarda sotuvga chiqadi. Rang variantlari orasida Blue Cave, Salt Lake, Polar Night va Black Gold Edition bo‘ladi. X Fold 6 Xitoyda 26-iyun kuni taqdim etilishi, global bozorga esa iyul oyida chiqishi kutilmoqda.
Qaynoq24.uz Vivo X Fold 6 taqdimot sanasi e’lon qilingani haqida yozgan edi.
