BYD’ning yangi flagman gibrid miniveni — BYD Linghui M9 Xitoy bo‘ylab avtosalonlarga yetkazila boshlandi. Bu haqda CNC xabar berdi.
Model hali rasman sotuvga chiqarilmagan va uning narxlari e’lon qilinmagan, biroq avtomobil allaqachon namoyish zallarida paydo bo‘lib, korporativ mijozlar va yirik avtoparklar e’tiborini jalb qilmoqda.
Linghui M9 biznes toifadagi ko‘p maqsadli avtomobil sifatida ishlab chiqilgan. U nafaqat kompaniyalar va tijorat flotlari, balki keng salonga ega oilaviy avtomobil izlayotgan xususiy xaridorlarga ham mo‘ljallangan.
Yangi model BYD’ning alohida korporativ ekotizimiga kiradi. Kompaniya bu yo‘nalish orqali ride-hailing, ya’ni taksi va buyurtma asosida yo‘lovchi tashish bozoriga mo‘ljallangan modellarni premium iste’molchi avtomobillaridan ajratishni maqsad qilgan. Bu strategiya BYD’ga tijorat segmentida yirik shartnomalarni qo‘lga kiritish, shu bilan birga oddiy yo‘lovchi avtomobillarining bozordagi imijini saqlab qolish imkonini beradi.
Linghui M9 BYD’ning zamonaviy texnologiyalari bilan jihozlanadi. Modelga kompaniyaning Eye of the Gods haydovchiga yordam berish tizimi, DiSus intellektual kuzov boshqaruvi platformasi, beshinchi avlod DM plug-in hybrid texnologiyasi hamda sakkizta funksiyani birlashtirgan elektr kuch uzatish tizimi o‘rnatiladi.
Avtomobilda takomillashtirilgan issiqlik boshqaruvi tizimlari ham qo‘llanadi. Bu yechimlar gibrid kuch qurilmasining samaradorligini oshirish, energiya sarfini optimallashtirish va tijorat foydalanishida barqaror ishlashni ta’minlashga xizmat qiladi.
Yangi miniven Xitoy bozorida BYD’ning oilaviy yo‘nalishdagi M9 modeli fonida paydo bo‘lmoqda. Xitoyda Xia nomi bilan sotiladigan ushbu modelning savdolari yil boshidan beri o‘zgaruvchan bo‘lib kelmoqda. Yanvarda 732 dona avtomobil sotilgan bo‘lsa, fevralda bu ko‘rsatkich 625 donaga tushgan. Mart oyida savdo 897 donagacha oshgan, may oyida esa 648 donani tashkil qilgan.
Qaynoq24.uz BYD Denza N8L 430 km elektr yurish zaxirasi bilan yangilangani haqida yozgan edi.
