Honor kompaniyasi yangi Honor X80 Pro Max smartfoni sanoatda 10 ming nitdan yuqori maksimal yorqinlikka ega ilk model bo‘lishini rasman tasdiqladi. Qurilma 22-iyun kuni taqdim etiladi. Avvalroq kompaniya smartfon ulkan 11 000 mA/soat sig‘imli akkumulyator bilan jihozlanishini ham ma’lum qilgan edi.
Honor e’lon qilgan yangi posterga ko‘ra, X80 Pro Max 1.5K aniqlikdagi, ya’ni 2788×1280 piksel o‘lchamli ekran bilan ta’minlanadi. Displey 120 Gs yangilanish chastotasini qo‘llab-quvvatlaydi. Kompaniya ekran yorqinligi Honor X70 modeliga nisbatan 67 foizga yuqori bo‘lishini bildirmoqda. Ekran atrofidagi romlar ham juda ingichka bo‘lib, ularning qalinligi atigi 1,3 mmni tashkil etadi.
Yangi smartfon Honor’ning Hummingbird Architecture 2.0 texnologiyasi asosida ishlaydi. Kompaniya ma’lumotiga ko‘ra, ushbu arxitektura qisqa videolarni tomosha qilish jarayonini 40 foizgacha ravonroq qiladi. Shuningdek, tizim fon rejimida xotirani tozalab boradi va smartfonning uzoq muddat barqaror ishlashiga yordam beradi.
Honor X80 Pro Max mustahkamlik bo‘yicha ham yuqori ko‘rsatkichlarga ega bo‘lishi aytilmoqda. Qurilma SGS tashkilotining Gold Label Five-Star sertifikatini olgan. Kompaniyaga ko‘ra, smartfon 3 metrgacha balandlikdan tushishga bardosh bera oladi. Honor ushbu ko‘rsatkichni qo‘llab-quvvatlash maqsadida ekran sinishi bilan bog‘liq holatlar uchun bepul ekran almashtirish xizmatini ham yo‘lga qo‘ymoqda. Brend buni sohada ilk shunday taklif deb atamoqda.
Yana nimalar ma’lum
Smartfonning to‘liq texnik xususiyatlari 22-iyun kuni rasmiy taqdimotda ochiqlanadi. Biroq hozirgacha tarqalgan ma’lumotlarga ko‘ra, Honor X80 Pro Max 6,8 dyuymli displeyga ega bo‘ladi. Old kamera 8 megapiksel, asosiy kamera esa optik stabilizatsiyaga ega 50 megapikselli sensor bilan jihozlanishi kutilmoqda.
Qurilma yangi Snapdragon 6 Gen 5 chipi asosida ishlashi mumkin. Biometrik xavfsizlik uchun optik barmoq izi skaneri qo‘llanadi. Shuningdek, smartfon chang va suvdan himoya bo‘yicha IP66, IP68, IP69 va IP69K standartlariga mos bo‘lishi aytilmoqda.
Eng qiziqarli jihatlardan biri shundaki, Honor X80 Pro Max 11 000 mA/soat akkumulyatorga ega bo‘lishiga qaramay, korpus qalinligi 8,08 mm, vazni esa 203 gramm atrofida bo‘lishi kutilmoqda. Bu esa modelni katta batareyali, ammo nisbatan ixcham va yengil smartfonlar qatoriga kiritadi.
Honor X80 Pro Max taqdimoti 22-iyun kuni mahalliy vaqt bilan soat 19:00 da bo‘lib o‘tadi. Model ekran yorqinligi, ulkan akkumulyatori va mustahkamlikka qaratilgan yechimlari bilan o‘rta segmentdagi eng e’tiborli yangiliklardan biri bo‘lishi mumkin.
Qaynoq24.uz Vivo X Fold 6 taqdimot sanasi e’lon qilingani haqida yozgan edi.
