AQSh prezidenti Donald Tramp sun’iy intellekt bo‘yicha farmonni imzolashdan so‘nggi daqiqada bosh tortdi. The Washington Post manbalariga ko‘ra, bunga texnologiya sohasi milliarderlari bilan telefon muloqotlari sabab bo‘lgan.
Farmon imzolanmay qoldi
Donald Tramp 21-may kuni sun’iy intellektni tartibga solishga oid farmonni imzolashi kerak edi. Tadbirga texnologiya sohasi vakillari ham taklif qilingan edi. Biroq marosimdan bir necha soat oldin Tramp qarorini o‘zgartirdi. WP ma’lumotiga ko‘ra, u bunga qadar Tesla va SpaceX rahbari Ilon Mask, Meta rahbari Mark Sukerberg hamda sobiq kripto maslahatchi Devid Saks bilan gaplashgan.
Manbalarga ko‘ra, texnologiya sohasi vakillari Trampga yangi tartiblar AQShda sun’iy intellekt rivojini sekinlashtirishi mumkinligini aytgan. Ular bunday cheklovlar Xitoy bilan raqobatda Amerika kompaniyalari pozitsiyasini zaiflashtirishidan xavotir bildirgan.
Hujjat nimani nazarda tutgan edi
Farmon loyihasida ixtiyoriy tizim yaratish taklif qilingan. Unga ko‘ra, kompaniyalar ilg‘or AI modellarini ommaga chiqarishdan oldin hukumatga 90 kungacha erta kirish imkonini berishi kerak edi.
Bu orqali hukumat yangi modellarni xavfli imkoniyatlar, zaifliklar va kiberxavfsizlik nuqtayi nazaridan tekshirishi mumkin bo‘lardi.
Loyihada bu tizim litsenziyalash yoki AI modellarini chiqarish uchun majburiy davlat ruxsati emasligi qayd etilgan.
Ammo Devid Saks, Ilon Mask va Mark Sukerberg kabi texnologiya sohasi vakillari bunga shubha bilan qaragan. Ularning fikricha, rasman ixtiyoriy ko‘ringan tizim amalda majburiy kelishuv mexanizmiga aylanishi mumkin.
Saks yangi qoidalar hatto kichik yangilanishlarni ham kechiktirishi mumkinligini aytgan. Bu esa AQShning Xitoy bilan texnologik raqobatdagi ustunligiga zarar yetkazishi mumkin.
Tramp ayrim bandlardan norozi bo‘lgan
The Washington Post yozishicha, Tramp hujjatdagi ayrim bandlar unga “yoqmagani”ni bildirgan. U farmon AQShning sun’iy intellekt sohasidagi ustunligini zaiflashtirmasligiga ishonch hosil qilishni istagan.
Ilon Mask esa X ijtimoiy tarmog‘ida o‘ziga qo‘yilgan da’volarni rad etdi. U Trampni farmonni imzolamaslikka ko‘ndirgani haqidagi xabarlarni yolg‘on deb atadi.
“Men hali ham bu farmonda nima bo‘lganini bilmayman. Prezident men bilan uni imzolashdan bosh tortganidan keyin gaplashdi”, dedi Ilon Mask.
Federal amaldorlardan birining aytishicha, farmon ustidagi ish to‘xtatilmagan. Administratsiya hujjatni keyinroq qayta muhokama qilishi mumkin. Ammo uning yakuniy shakli qanday bo‘lishi hozircha noma’lum.
Qaynoq24.uz Tramp administratsiyasi Green Card tartibini kuchaytirgani haqida yozgan edi.
